વલસાડમાં રવિન્દ્ર જાડેજા દારૂ સાથે ઝડપાઈ ગયો: પોલીસે કરી ધરપકડ

ગુજરાત એલર્ટ । વલસાડ
વલસાડના ધમડાચી હાઈવે પર આઇશર ટેમ્પોમા ભંગારની આડમાં સંતાડીને લઈને જવાતો રૂ. 1.51 લાખનો દારૂ એલસીબી પોલીસે ઝડપી પાડી ટેમ્પો ચાલક રવિન્દ્ર જાડેજા તથા ક્લિનર મુકતાર શેખની ધરપકડ કરી છે. જયારે 3 ને વોન્ટેડ જાહેર કર્યા છે.
પોલીસ સુત્રો પાસેથી મળતી માહિતી મુજબ એલસીબી પોલીસની ટીમ હાઇવે ઉપર પેટ્રોલિંગમાં હતી. ત્યારે બાતમી આધારે વલસાડ ઘમડાચી પીરૂ ફળિયા પાસે સુરત તરફ જવાના માર્ગે વોચ ગોઠવી હતી. બાતમીવાળો આઇશર ટેમ્પો (નંબર જીજે 04 એ ડબલ્યુ 6062) આવતા પોલીસે ટેમ્પો અટકાવ્યો હતો. આ ટેમ્પોમાં તપાસ કરતા ભંગારની આડમાં સંતાડીને લઈ જવાતો રૂ. 1.51 લાખનો ઇંગ્લિશ દારૂ બોટલ નંગ 240 મળી આવ્યો હતો. પોલીસે દ્વારકામા રહેતો ટેમ્પો ચાલક રવિન્દ્રસિંહ નોઘુભા જાડેજા અને ભાવનગરમાં રહેતો ક્લીનર મુકતાર હુસેન મહમદ શેખની પોલીસે બંનેની ધરપકડ કરી છે. પોલીસે દારૂ અને ટેમ્પો મળીને કુલ રૂ. 6.71 લાખનો મુદ્દા માલ જપ્ત કરી માલ ભરાવનાર અને મંગાવનારને પોલીસે વોન્ટેડ જાહેર કરી આગળની કાર્યવાહી હાથ ધરી છે.