ગુજરાત એલર્ટ । ખેરગામ
ખેરગામ પોલીસ મથકમાં છેલ્લા 9 મહિનાથી ફરજ બજાવી રહેલા પીએસઆઇ.આર પઢેરિયાની મહેસાણા ખાતે બદલી થતાં ગુરૂવારના રોજ સાંજે પોલીસ મથક ખાતે વિદાય સમારંભનો કાર્યક્રમ યોજાયો હતો. જેમાં ખેરગામના ડેપ્યુટી સરપંચ જીગ્નેશભાઈ, યુવા ભાજપ પ્રમુખ ચેતનભાઇ પટેલ, ઉપપ્રમુખ સુરજભાઈ પટેલ, દિનેશભાઈ પટેલ, ખેરગામ મુસ્લિમ સમાજ પ્રમુખ ગુલામ શેખ, તાજીયા કમિટીના પ્રમુખ સોયબ શેખ, માજી પ્રમુખ ઇબ્રાહિમ શેખ, એડવોકેટ અખ્તર શેખ, ખેરગામ અંબિકા યુવક મંડળના વિજયભાઈ રાઠોડ, સંજ્યભાઈ, મિતેશભાઇ, કિશનભાઇ, સાવનભાઈ સહિત મોટી સખ્યામાં પોલીસ સ્ટાફ ઉપસ્થિત રહ્યો હતો. ખેરગામ તાલુકામાં કાયદો અને વ્યવસ્થાને ખુબ સારી રીતે જાળવી રાખવા તેમજ અસામાજિક તત્વોની સાન ઠેકાણે લાવવા બદલ તેમની કામગીરીને ઉપસ્થિત મહેમાનોએ બિરદાવી હતી. તેમજ મહેસાણા ખાતે પણ તેઓ આનાથી પણ ખૂબ સારી કામગીરી કરી મોટી નામના મેળવે એવી શુભેચ્છાઓ પીએસઆઇ ડી.આર. પઢેરીયાને પાઠવી હતી.
ખેરગામ પોલીસ મથકમાં નવનિયુક્ત પામેલા પીએસઆઇ એમ.ડી.ગામીને ઉપસ્થિત અગ્રણીઓએ પુષ્પગુચ્છ આપી આવકાર આપ્યો હતો. તેમજ પીએસઆઇ ડી.આર. પઢેરિયાને વિદાયના સમયે તેમના ઉપર પુષ્પવર્ષા વરસાવી તેમને ભાવભરી વિદાય આપી હતી. પીએસઆઇ ડી.આર પઢેરીયાએ ઉપસ્થિત અગ્રણીઓ તેમજ પોલીસ સ્ટાફનો દિલથી આભાર વ્યક્ત કર્યો હતો.
