ગુજરાત એલર્ટ | વલસાડ
મુંબઈનાં જૂહુમાં યોજાયેલા છઠ્ઠા દાદાસાહેબ ફાળકે ઇન્ડિયન ટેલિવિઝન એવોર્ડ-2023 માં વલસાડના ડાન્સ ગુરૂ ફેનીલ ગાંધીની બેસ્ટ એક્ટર અને કોરિયોગ્રાફર કેટેગરીમાં એવોર્ડ આપવામાં આવતા વલસાડનું ગૌરવ વધ્યું છે.
ફિલ્મોરા મીડિયા નેટવર્ક દ્વારા પ્રસ્તુત દાદાસાહેબ ફાળકે ઇન્ડિયન ટેલિવિઝન એવોર્ડનું સતત છઠ્ઠા વર્ષે આયોજન થયું હતું. 17મી સપ્ટેમ્બર 2023 ના રોજ મુંબઈ જુહુની હયાત સેન્ટ્રિક હોટલમાં યોજાયેલા આ એવોર્ડ સમારંભમાં ટેલિવિઝન ક્ષેત્ર સાથે સંકળાયેલા એક્ટિંગ, કોરિયોગ્રાફર, સપોર્ટિંગ રોલ, ફેશન ડિઝાઇનીંગ, રાઇટર, કેમેરામેન, મેકઅપ આર્ટિસ્ટ, હેર ડિઝાઇનર જેવી જુદી જુદી કેટેગરીઓમાં 60 થી 70 જેટલા એવોર્ડ આપવામાં આવ્યા હતા. જેમાં એક્ટર/કોરિયોગ્રાફરની કેટેગરીમાં વલસાડના સરસ્વતી ઇન્ટરનેશનલ સ્કૂલના ડાન્સ ટીચર અને વલસાડના એએફ ડ્રીમ ગરબા ક્લાસના સંચાલક ફેનીલ ગાંધીને જાણીતી એક્ટ્રેસ મંદાકિનીનાં હસ્તે એવોર્ડ આપવામાં આવ્યો હતો.
અત્રે ઉલ્લેખનીય છે કે ફેનીલ ગાંધીએ મુવીમાં કોરિયોગ્રાફર ઉપરાંત ગુજરાતી ફિલ્મો તથા જુદી જુદી સિરીયલોમાં એક્ટર તરીકે કામ કર્યું છે. વલસાડના યુવાને મુંબઈની ટીવી ફિલ્મ ક્ષેત્રનો એવોર્ડ મળતા વલસાડવાસીઓએ ગૌરવની લાગણી અનુભવવા સાથે અભિનંદનનો વરસાદ વરસાવ્યો હતો.
