વાપી જીઆઈડીસીમાંથી અજાણ્યા આધેડની લાશ મળી

ગુજરાત એલર્ટ | વલસાડ
મુંબઈથી સુરત તરફ જતા ને.હા.નં.૪૮ ના સર્વિસ રોડ પાસે વાપી જીઆઈડીસીમાં સુમીટોમો ઈન્ડિયા કેમિકલ લિ. કંપનીની બાજુમાં ખુલ્લી જગ્યામાં તા. ૧૦ ઓક્ટોબર ૨૦૨૩ના રોજ બપોરે ૩ વાગ્યાની આસપાસ એક અજાણ્યા ૪૫ થી ૫૦ વર્ષીય યુવકની લાશ મળી આવી હતી. જેના શરીરે માર કે ઈજાના કોઈ નિશાન જોવા મળ્યા ન હતા. મૃતક શરીરે ઉઘાડો છે. જેના માથા નીચે ઓશિકા તરીકે કાળા અને સફેદ કલરનો આખી બાયનો શર્ટ મળી આવ્યો છે. કમરે બ્લ્યુ કલરનું ટ્રેક પેન્ટ પહેર્યુ છે. જમણા હાથના કાંડાના ભાગે લાલ કલરનો દોરો અને સિલ્વર કલરનું કાળા પટ્ટાવાળુ ઘડિયાળ પહેરેલુ છે. મૃતક ઘઉં વર્ણ, ૫ ફૂટ ૪ ઈંચ ઉંચાઈ, લંબગોળ મોઢુ, સાધારણ મુછ-દાઢી અને માથે કાળા-સફેદ વાળ ધરાવે છે. જે કોઈને પણ અજાણ્યા મૃતકના વાલી વારસોની ભાળ મળે તો વાપી ઉદ્યોગનગર પોલીસ મથકે જાણ કરવા અખબારી યાદીમાં જણાવાયુ છે.