વલસાડ સરકારી ઇજનેરી કોલેજ ખાતે વાર્ષિક ખેલ મહોત્સવ ઉજવાયો

ગુજરાત એલર્ટ । વલસાડ
વલસાડની સરકારી ઇજનેરી કોલેજ ખાતે વાર્ષિક ખેલ મહોત્સવ “ચેમ્પસ કપ-૨૦૨૪”નું આયોજન તા. ૧ થી ૭ માર્ચ કરવામાં આવ્યું હતું. આ દરમ્યાન ઇન્ડોર, આઉટડોર તથા એથલેટિક એમ જુદી જુદી કુલ ૨૨ જેટલી રમતોનું આયોજન કરવામાં આવ્યું હતું.
કોલેજના આશરે ૧૨૦૦ થી વધારે વિદ્યાર્થીઓએ અલગ અલગ રમતોમાં ભાગ લઈ ઉત્સાહ અને ઉમંગથી ખેલ મહોત્સવની ઉજવણી કરી હતી. આ દરમ્યાન વલસાડ નગરપાલિકાના ચીફ ઇજનેર હિતેશ પટેલે સંસ્થાની મુલાકાત લીધી હતી તથા એમના દ્વારા કબડ્ડી તથા ક્રિકેટમાં વિજેતા ટીમને પુરસ્કાર એનાયત કરવામાં આવ્યો હતો. સંસ્થાના આચાર્ય ડૉ.વી. ડી.ધીમન દ્વારા વિજેતા થયેલા વિદ્યાર્થીઓને શુભેચ્છા પાઠવવામાં આવી હતી. આ ખેલ મહોત્સવનું આયોજન સંસ્થાના રમતગમતના સંચાલક અધિકારી પ્રો.કે.એ.ચૌધરી તથા સહસંચાલક અધિકારી પ્રો.પી.જે.પટેલ તથા સ્પોર્ટ્સ કમિટીના સભ્યો દ્વારા કરવામાં આવ્યું હતું.