વલસાડ
હપ્તા ન આપે તો જાતે ફેક્ટરી પર પહોંચી કેસ કરવાની ધમકી આપતા ફૂડ એન્ડ ડ્રગ્સ વિભાગના અધિકારીઓ ગ્રાહક દુકાનોમાં ખાણીપીણીની ચીજવસ્તુઓ સંબધે ટેલિફોનીક ફરિયાદ કરે તો કચેરી આવી લેખિત ફરિયાદ કરો તો જ કાર્યવાહી થાય તેવી કેસેટ વગાડે છે. આજે એક ગ્રાહકે એક્સપાયરી વાળી છાસ વેચાતી હોવાની જાણ કરતાં અધિકારીઓએ લેખિત ફરિયાદ કરવાની ખો આપી નફ્ફટાઈ દર્શાવી હતી.
તાજેતરમાં વલસાડ ફૂડ એન્ડ ડ્રગ્સ વિભાગના બે બે અધિકારીઓ એક સાથે લાંચ લેતા ઝડપાતા ચર્ચાનો વિષય બન્યો હતો. ગત બુધવારે વલસાડ નજીકના એક ગામમાં ફેકટરીમાં બેકરી પ્રોડકટસના મેન્યુફેકચરીગ માટેના લાઈસન્સ બાબતે ફુડ એન્ડ ડ્રગ્સ વિભાગ, વલસાડના લાઈસન્સ ઈશ્યુ કરનાર અધિકારી દિવ્યાગ બારોટ ફેકટરીમાં હેરાનગતિ નહીં કરવા વાર્ષિક હપ્તા પેટે રૂ.૫૦,૦૦૦ તથા ફુડ સેફટી ઓફિસર જયોતીબેન રૂ. ૧૦,૦૦૦ વાર્ષિક હપ્તો લેતાં એસીબીના હાથે ઝડપાઈ ગયા હતા. આ બંને અધિકારીઓ હાલ રિમાન્ડ હેઠળ છે.
એક સાથે બે અધિકારીઓ એસીબી ની રેડમાં જડપાઈ જતા વલસાડના જરફિરોઝ બિલ્ડિંગમાં આવેલી ફૂડ એન્ડ ડ્રગ્સ વિભાગની કચેરીમાં દોડધામ મચી ગઈ હતી. દરમ્યાન આજરોજ એક ગ્રાહકે તિથલ રોડ ઉપર આવેલી કરિયાણાની દુકાનમાં છાશ એક્સપાયરી ડેટ વાળી વેચતા હોવાની ફૂડ સેફટી ઓફિસર કે.ડી. પટેલને ફોન પર જાણ કરતા તેમણે ફૂડ એન્ડ ડ્રગ્સ વિભાગના આસિસ્ટન્ટ કમિશનર અરવિંદ ઝાલાને જણાવ્યું હતું. જે બાદ આસિસ્ટન્ટ કમિશનરે ગ્રાહકને કચેરી આવી લેખિત ફરિયાદ કરવાનો આગ્રહ કર્યો હતો. એમના કહેવા મુજબ કોઈ પણ ગ્રાહકે ખાણીપીણી સંબંધી લેખિત ફરિયાદ કરશે તો જ ફૂડ એન્ડ ડ્રગ્સ વિભાગ કાર્યવાહી કરશે.
આ મામલે ફૂડ એન્ડ ડ્રગ્સ વિભાગના આસિસ્ટન્ટ કમિશનર ઝાલા સાથે વાતચીત કરતા તેમણે ઇન્ચાર્જ ડેઝીગ્નેટેડ ઓફિસર દિવ્યાંગ બારોટ લાંચમાં સપડાયા બાદ કોઈને ચાર્જ સોંપાયો ન હોય કાર્યવાહી કરવા સંદર્ભે લાચારી દર્શાવી હતી. પોતે કચેરીના વડા હોવા છતાં તેમણે જવાબદારીમાંથી છટકવાનો પ્રયત્ન કર્યો હોય તેમ લાગ્યું હતું. જોકે અંતમાં તેમણે એક્સપાયરી ડેટ વાળી છાશનો જથ્થો નાશ કરાવવા માટે કોઈક અધિકારીને મોકલવા સંમતિ દર્શાવી હતી.
અલબત્ત જ્યારે અધિકારીઓ લાંચ લેતા પકડાયા ત્યારે અધિકારીઓએ લેખિત ફરિયાદની રાહ જોઈ ન હતી. તેમણે હપ્તો ન મળે તો સેમ્પલ ફેલ કરી કેસ કરવાની ધમકી આપી હતી. વલસાડ ફૂડ એન્ડ ડ્રગ્સ વિભાગના અધિકારીની બેધારી નીતિ ફરી વિવાદમાં આવી છે. એક સાથે બબ્બે અધિકારીઓ લાંચના છટકામાં સપડાયા હોવા છતાં અધિકારીઓ હજુ સુધર્યા ન હોવાની ચર્ચા થઈ રહી છે.
વલસાડ ફૂડ એન્ડ ડ્રગ્સ વિભાગના અધિકારીઓનાં આવા વલણથી જ ફરિયાદ કરનારાઓ ત્રાસી જાય છે.
વલસાડ ફૂડ એન્ડ ડ્રગ્સ વિભાગના અધિકારીઓના વલણ પરથી એવું સમજાય છે કે તેઓ હોટલ અને દુકાનદારોને એક્સપાયરી ડેટવાલી ખાણીપીણીની ચીજવસ્તુઓ વેચવા પ્રોત્સાહન આપી રહ્યા છે. કોઈ ગ્રાહક એક્સપાયરીડેટવાળો સામાન લે અને તેણે જાગૃત નાગરિક તરીકે ફૂડ વિભાગને ફરિયાદ કરવી હોય તો તેને લેખિતમાં જ ફરિયાદ કરવી પડશે એવો રવૈયો અધિકારીઓએ અપનાવ્યો છે. એટલે કે ગ્રાહકે પોતાનો કામ ધંધો કે સમય બગાડી ફૂડ એન્ડ ડ્રગ્સ વિભાગની કચેરીના આંટા મારવા પડશે ત્યારે ફૂડ એન્ડ ડ્રગ્સ વિભાગ કાર્યવાહી કરશે. ફૂડ અને ડ્રગ્સ વિભાગનું એ કામ છે તેમણે એક્સપાયરી ડેટવાળો માલ સામાનની જાણ થાય કે દેખાય તો નાશ કરવાનો થાય છે. ત્યારે આ કિસ્સામાં કાર્યવાહી કરવાની જગ્યાએ અધિકારીઓ જો આવું વલણ રાખતા હોય તો પછી ફરિયાદ કરશે કોણ? કે પછી આ બધું હપ્તા સિસ્ટમને કારણે ચાલી રહ્યું છે તે તો ભગવાન જ જાણે?
