વલસાડ
વલસાડ છીપવાડના રહેવાસી અને સતત ત્રણ પેઢીથી વલસાડમાં સેવાકીય પ્રવૃતિઓ સાથે સંકળાયેલા પાંડે પરિવાર દ્વારા એમના માતૃ સ્વ.મીનાબેન કૈલાશનાથ પાંડેની પુણ્યતિથિ નિમિત્તે છેલ્લા ૧૩ વર્ષથી વલસાડ નગરપાલિકા દ્વારા સંચાલિત મ્યુનિસિપલ હોસ્પિટલ ખાતે સારવાર અર્થે આવતા જરૂરિયાતમંદ લોકોને સહાયરૂપ થવાના શુભ આશય સાથે જીવનરક્ષક દવાઓ જે ગંભીર બીમારીઓમાં અત્યંત ઉપયોગી જેવી કે ડાયાબિટીસ, કાર્ડિયાક , બ્લડ પ્રેશર, વાયરલ તાવ અને ખુબ જ ઉપયોગી દવાઓ સાથે વિવિધ ગ્લુકોઝની કુલ ૪૦૬૦/- બોટલો ડીસઈનસફેકટન્ટ, સેનેટાઈઝરનું નિઃશુલ્ક વિતરણના કાર્યક્રમનું આયોજન વલસાડ નગરપાલિકા સંચાલિત સ્પોર્ટ્સ કોમ્પલેક્ષ ખાતે રાખવામાં આવ્યો હતો. જેમાં વલસાડ, નવસારી જીલ્લાના એમ.આર.મિત્રોનો સિંહફાળો રહ્યો હતો. આ તબક્કે વલસાડ જિલ્લા ભારતીય જનતા પાર્ટીના મહામંત્રી કમલેશભાઈ પટેલએ સ્વ. કૈલાશનાથ પાંડેજી અને એમના પરિવારની સેવાકીય પ્રવૃતિઓ સમાજ માટે ઉદાહરણ બનશે તેમ જણાવી પાંડે પરિવારના મોભી સ્વ.અમરનાથ પાંડેજી દ્વારા કરવામાં આવેલા સેવાકીય કાર્યોને પણ યાદ કર્યા હતા. કાર્યક્રમમાં પાંડે પરિવારના દિવ્યેશ પાંડે દ્વારા મહેમાનોનું શાબ્દિક સ્વાગત કરવામાં આવ્યું હતું. તેમજ પરિવારના પ્રજ્ઞેશ પાંડે દ્વારા પરિવાર દ્વારા આપવામાં આવતી. નિઃશુલ્ક સહાય અંગેની વિસ્તૃત માહિતીઓ આપવામાં આવી હતી. વલસાડ મ્યુનિસિપલ હોસ્પિટલ ના ડો.રોહનભાઈ પટેલ દ્વારા પાંડે પરિવાર થકી હોસ્પિટલને કરવામાં આવતી સહાય અંગે આભાર વ્યક્ત કરી આ કાર્ય અવિરત ચાલુ રહે એવી આશા વ્યક્ત કરી હતી.
કાર્યક્રમમાં વલસાડ વિભાગના ડી.વાય.એસ.પી. એમ.એન.ચાવડા દ્વારા પાંડે પરિવાર દ્વારા સતત કરવામાં આવતી સેવાકીય પ્રવૃત્તિને બિરદાવી હતી. કાર્યક્રમમાં સોનલબેન સોલંકી, ઝાકીરભાઈ પઠાણ, રાજુભાઇ મરચાં દ્વારા પાંડે પરિવારની સેવા ભાવનાને મંચ પરથી બિરદાવી સ્વ. શ્રી કૈલાશનાથ પાંડેજી કાર્યોને યાદ કરી એમની ખોટ સહુને પડી રહી હોવાની વાત કરી હતી. આ તબક્કે વલસાડ જીલ્લા ભારતીય જનતા પાર્ટીના કોષાઅધ્યક્ષ રાજેશ ભાનુશાલી, ભારતીય જનતા પાર્ટીના પ્રદેશ લઘુમતી મોરચાના મંત્રી ઈલિયાસ મલેક, વલસાડ જિલ્લા કોંગ્રેસના જીલ્લા આગેવાન અને પારડી સાંઢપોર ગામના સરપંચ ધર્મેશ ઉર્ફે ભોલાભાઈ પટેલ, ડો.અજય પરમાર, વલસાડ નગરપાલીકાના માજી પ્રમુખ સોનલબેન સોલંકી, પ્રેસ કલબ ઓફ વલસાડના પ્રમુખ ઉત્પલભાઈ દેસાઈ, માજી નગરપાલીકા પ્રમુખ રાજેશ પેટલ (રાજુભાઇ મરચાં) વલસાડ વિભાગ કેમિસ્ટ એસોસિયેશનના પ્રમુખ કૌશિકભાઈ માકડીયા,વલસાડ નગરપાલીકાના સિનિયર સભ્યો ઝાકિરભાઈ પઠાણ, ઈમ્તિયાઝભાઈ કાઝી, મુસ્લિમ સમાજના અગ્રણી મૌલાના અફઝલ, પાંડે પરિવારના વડીલ પ્રભાશંકર પાંડે હાજર રહ્યા હતા. કાર્યક્રમના અંતે વલસાડ વિભાગના ડી.વાય.એસ.પી મનોજસિંહ ચાવડાની બદલી અમદાવાદ ખાતે બદલી થતા તેમના ૪ વર્ષના કાર્યકાળને બિરદાવી પાંડે પરિવારના સભ્યો બ્રિજેશ, જ્ઞાનેશ, યજ્ઞેશ, પ્રજ્ઞેશ, દિવ્યેશ પાંડે દ્વારા તેમને શાલ ઓઢાવી પુષ્પગુચ્છ આપી સન્માન કરવામાં આવ્યું હતું. તેમજ હાજર પત્રકારો અને મહેમાનો દ્વારા પણ તેમનું સન્માન કરવામાં આવ્યું હતું. આ કાર્યક્રમમાં પાંડે પરિવારના પરિવારજનો, મિત્રવર્તુળ ઉપસ્થિત રહ્યા હતા. સમગ્ર કાર્યક્રમનું સંચાલન પાંડે પરિવાર ના પુત્રવધુ તેમજ શિક્ષિકા મેઘાબેન પાંડે દ્વારા કરવામાં આવ્યું હતું.
